Luk 14 | KYG | STEP | Mago Sapati afina'mo Yesu'a Falasi vekamo yagaino ne'apateya vekamo nopi'mo ne'ya'mo nesiyafe'mo haino mai'nige'apae'mo yagai'a mai'ne'a aulu he'a mai'nae.

Luke 14

Yesu'a agufamo ko si'niya vekamo alino alagepa huno ate'niya gemae

1 Mago Sapati afina'mo Yesu'a Falasi vekamo yagaino ne'apateya vekamo nopi'mo ne'ya'mo nesiyafe'mo haino mai'nige'apae'mo yagai'a mai'ne'a aulu he'a mai'nae. 2 Inagi mago vekamo agufamo ko si'niya vekamo Yesu haopale'mo mai'niye. 3 Yesu'a ani vekamo ageteno'ae'mo ke'aepa gemo ne'afiya vaya'e Falasi vaya'efe'mo, Sapati afina'mo ali'a alagepa hu'a ne'apataya kavafe'mo ke'aepa gemo'a huno'ae'mo, hiyo huno hu'nifi osiyo, huno hu'niye, huno apafi ge'nige'apae'mo 4 ge osu'a mai'nae. Agaemo alino alagepa huno ateteno'ae'mo, afa'a uvo, huno ha paiteno'ae'mo, 5 lapakaepati'mo haiya vekamo'mo mafa'ne'amofi pulumaka'amofi huno sapati afina'mo kelifi'mo asagauno aino mai'nisigeno'ae'mo kelifati'mo malage huno lamino o'avalegaiye, huno apafi ge'nige'apae'mo 6 ge'ale'mo afa'a ae'a atagaina hu'a ha opai'nae.

Lusi yagitamo hu'a ne'nayategamo mai'neno hapa pai'niya gemae

7 Yesu'a apakeyana vaya'mo e'a ala apaki vaya'mo ne'maiya siate'mo mai'nageno apaketeno'ae'mo aeno kalafefa gemo huno hapa paino'ae'mo, 8 a'mo lagaugefe'mo lusi yagita huteno'ae'mo ge hisigetapa etapae'mo ala apaki vaya'mogi ne'maiya yate'mo haitapa o'maiyo. Fiku yanageno mago aeno kaga se'nisiya vekamo esigeno'ae'mo 9 lanakaefe'mo ge hu'niya vekamo'mo eno kaha paino'ae'mo, he tika ugeno'ao ani vekamo maino, huno hisigekae'mo lusi kava huno kavagage hisigeka lamika henaga siate'mo maigane. 10 Hugiya'mofe'mo ge hisigeka ukae'mo henaga siate'mo haika maiyo. Kagaefe'mo ge hu'niya vekamo'mo eno'ae'mo, ve'nimo, ala apaki vaya'mogimo ne'maiya siate'mo haika maiyo, huno kaha paisigekae'mo kagae'e'mo magokepi lokae'a mai'naya vaya'ai apaulagale'mo ala kagikamo aligane. 11 Muki vaya'mogimo apakai'api apaki'apile'mo ali'a asaga nehisaya'mo'mo Goti'a apaki'apile'mo alino afepi apategaiye. Mago vaya'mogimo apakai'api apaki'apile'mo ali'a afepi ne'atesaya'mo'mo Goti'a apaki'apile'mo alino asaga huno apategaiye, huno hapa pai'niye. 12 Agaemo agaefe'mo ge hu'niya vekae'mo, yagita hisana afina'mo kao vayanagi konagakagi nofi vayakagi nokalega kagemi ya'api'e vayanagi huka ge osuvo. Fiku yanage'a yagita hisaya afina'mo kagaefe'mo eno, hu'a ge hisageka visanage'apae'mo anonakalefe'mo kamigae. 13 Yagita nehana afina'mo kagemi ya'apimo o'male'nisaya vayanagi apakufamo hosu'nisiya vayanagi apaiyamo hosu'nisiya vayanagi apaulagamo ali hu'nisiya vaya'aifenagi huka ge huvo. 14 Anonakalefe'mo afa'a okamigaya'mofe'mo Goti aulagale'mo alagepa huka mai'neka afa'a kamogaga aigane. Goti'a fatago vaya'mo kanolufati'mo he tisaya afina'mo anonakalefe'mo kamigiya'mofe'mae, huno hapa pai'niye.

Alopa ne'yafe'mo aeno kalafefa gemo hu'niya gemae

(Mt 22:1-10)

15 Agae'e'mo hi'yalemute'mo mai'neno ne'ya'mo ne'niya vekamo'a ani gemo afiteno'ae'mo, Goti'a yagaino ne'apateya kote'mo hai'a mai'ne'a ne'ya'mo ne'a maisaya vaya'mogimo Goti aulagale'mo alagepa hu'a mai'nayanage'a afa'a apamogaga aigae, huno hapa pai'niya gee'mo loka hu'nigeno 16 Yesu'a, mago vekamo'a lusi yagita nehuno'ae'mo asole vaya'aife'mo ge hu'niye. 17 Ne'ya'mo ago kae maleteno apa vekae'mo, ge hu'nova vaya'aitegamo ukae'mo, muki ne'ya'mo ago kae male'niyanagi eyo, huka hapa paiyo, huno ha paiteno alino ate'nigeno uno ani gemo huno hapa pai'niye. 18 Muki vaya'amogi magoke agufa ge'age'mo hu'apae'mo, visuna afinatimo ohane'niyanageta afa'a o'ugune, hu'a hu'nae. Mago vekamo'a, mago mopamo miya fai male'novanage'na u'na agegauva'mofe'mo kahao ke hovanage'na o'uguve, huno ha pai'nigeno 19 mago alu vekamo'a, teni'a pulumakamo ali'ya'mo ne'aliya pulumakamo miya fai male'novanage'na ali'ya'mo kanale hu'a ne'alifi no'alifi hu'na u'na agegauva'mofe'mo kahao ke hovanage'na afa'a o'uguve, huno ha pai'nigeno 20 mago alu vekamo'a, nagaemo hemenitomo a ali'novanage'na afa'a o'uguve, huno ha pai'niye. 21 Ali'ya'amo ne'aliya vekamo halate aino atagineno eno ali'ya aepa vekae'mo ani gemo ha pai'nigeno afiteno'ae'mo aipamo le'nigeno ali'ya'amo ne'aliya vekae'mo, malage huka uka taonifi'mo alopa kate'e aise kate'e'mo ne'ukae'mo kagemi ya'apimo o'male'nisaya vayanagi apakufamo hosu'nisiya vayanagi apaulagamo ali hu'nisiya vayanagi apaiyamo hosu'nisiya vayanagi huka apavalelika eka nagae nopi'mo apato, huno ha pai'nigeno 22 ali'ya'amo ne'aliya vekamo'mo ani kava'mo ago huteno'ae'mo, Ala nene, naha pai'nana kava'mo ago hu'nova'monanafa mago vaya'mo maisaya ya'mo afa'a hane'niye, huno ha pai'nigeno 23 ne'ya aepa vekamo'a ali'ya'amo ne'aliya vekae'mo, kale kategati'e hoya kategati'e'mo uka no'nifi'mo fai'a kili paesayafe'mo apayate alika apavalelika eno. 24 Muki vaya'aife'mo hogote'na ge hu'nova vaya'mogimo ne'ya'nimo afa'a e'a o'negae, huno hu'niye, huno Yesu'a hapa pai'niye.

Vaya'mogimo hogote'a alagepa hu'a apakesa afite'a Yesu'mo akame hisaya kavafe'mo hu'niya gemae

(Mt 10:37-38)

25 Yesu'a asole vaya'e'mo magokepi ne'uno'ae'mo aino afe leno hapa paino'ae'mo, 26 Nagaetegamo esiya vekamo'mo afo'amofenagi ita'amofenagi a'aenagi mafa'ne'aenagi konaga'amogifenagi asa'amogifenagi agai'amo alagepa huno maisiya yafenagi huno hogoteno hau'nisiyana ge'nimo ne'afiya vekamo afa'a o'maigiye. 27 Ina lagimo malipu yosa'apimo ali'a kofili'a nakame nosisafige'a ge'nimo ne'afiya vaya'mo afa'a o'maigae. 28 Lapakaepati'mo ina la'mo lusi yatala no'mo kisiyafe'mo hogoteno agesa no'afiye. Itopale mai'neno'ae'mo, ina agufa kava hu'na ki'na hano hisuvafe'mo na magi monileti'mo muki ya'amo miya faigufi, huno agesa afigiye. 29 Hogoteno agesa o'afi'neno no'mo aepa faino ki'nisiyana moni'amo hano hisigeno'ae'mo no'amo kino hano osuno afa'a ategaiye. Vaya'mogi e'a agete'apae'mo, 30 ani vekamo'a no'mo aepa faino ki'niya'monanafa afa'a kino hano osugiye, hu'a faipa hu'a ategae.

31 Ani kava huno haiya ala kini vekamo'a kame hisiyafe'mo hogoteno agesa no'afiye. Ha'ao, hogoteno agesa afino'ae'mo, teni tauseni'a ati vaya'nimo mai'nayanage'na u'na mago alu kini veka'e'mo kame hugu'ana ati vaya'amo tueti tauseni'a ati vaya'amo mai'nae. Nagaemo kame hu'na ae'na aga sesufi agaemo kame huno aeno naga sesifi, huno agesa afigiye. 32 Kame hisu'ana afa'a ae'na o'aga segauve, huno agesa afi'nisiyana kame hisa'a kini vekamo o'meno afagitega mai'nisigeno'ae'mo apa vaya'aife'mo, kame osuta afa'a atesunafe'mo na kava hisune, hutapa afi geyo, huno hapa paiteno alino apatesige'a ugae. 33 Ani kavakana hu'a ina lagimo muki apakai'api yafe'mo apakame'yamo no'amisafi ge'nimo ne'afiya vaya'mo afa'a o'maigae, huno hapa pai'niye.

Yesu'mo ataleno usiya vekamo haga nosiya hagegana huno mai'niya gemae

(Mt 5:13; Mk 9:50)

34 Hagemo kanale ya'mo hane'niya'monanafa haga nehiya ya'amo hano hisigeno'ae'mo haiya kava huno halate haga hisiya ya'amo alino ha maleno ategaiye. 35 Ani agufa hagemo'a ali'ya'amo alagi ohane'niya'mofe'mo ali'a yaga au'a ne'atalae. Gemo afisaya lapakesa hane'nisiyana mani gemo alagepa hutapa afiyo, huno hapa pai'niye.